By: Victor Zika

Tum khat chu Albert Einstein-a zirtir school naupang pakhat hian Albert Einstein-a hnenah “Ka pu nga ti nge kumtin mai a zawhna (question) inang ringawt min zawh thin a? a dangte thlak ve tawh la” tiin a ti a.

Albert Einstein-a chuan “a ni khawp mai, kumtin ka zawhna chu inang mahse, a chhanna erawh a inang ngai miah lo a nia” tiin a chhang ta daih mai.

Kumin 2023 hian Pathian chuan kum dang ang bawkin a ngai te kum khat tan,  

Minutes  525,600

Darkar 8,760

Ni 365

Chawlhkar 52 or 53

Thla 12

min pe a, engtin nge kan chhan ang le, engtin nge kan chanchin phekah nitin kan ziah tak ang le?

Mosia hnena Pathianin dan sawm a pek kha han en i la, a hmasa pali-te chu Pathian leh mihring inkara kan tihtur a ni. A dang paruk-te chu mihring leh mihring inkara kan tihturte an ni.

Chu Mosia hnena dan sawm pek chu Isua’n awlsam takin a rawn sawi a.

Mosia hnena dan sawm pek  1-4 tlangkawm nan “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tûr a ni,’ (Marka 12:30)

Mosia hnena dan sawm pek 5-10 tlangkawm nan  ” Nangmah i inhmangaih angin i vêngte pawh i hmangaih tûr a ni” (Matthaia 22:34:36)

“Tin, miin in chunga an tiha in duh tûr ang zêlin, mi chungah pawh ti ve rawh u” (Luka 6:31)

He kan biak leh rin Pathian thupek ropui tak hi, minute-tin, darkar-tin, Nitin, Chawlhkar-tin, thla-tin zawm thei i la, chuan kan 2023 kan chanchin hi kan ziak mawi ngawt ang. Zawm tumte tan tanpui turin Lalpa a inpeih reng bawk.

Kan nitin kan nunah, kan chhungkua-ah, kan hnathawhna hmun-ah, kan meeting-na hmunah Pathian kan hnenah a awm reng a ni, ka awm dan, ka tih dan, ka thu sawi hi, Lalpa’n engtinnge a ngaih ang le? tih ngaihtuah leh hre chung zelin 2023 kan kum tluan nun hi, Pathian nen ziak dun turin, ke i pen ang u.

Pathian nen chuan engkim a tihtheih vek a ni.