JUDA-TE NAUPANG ENKAWL DAN

By:- Victor Zika

Kum zabi 20 bawr vela Nobel Prize dawng hmun nga a thena hmun khat chu, Juda mi an ni. Hitler a nunrawnna avangin hnam bo lek lek khawpa tih duhdah tur ni mahse, an rawn din chhuah leh hunah chuan khawvela mifing, mithiam, mi remhria leh thluak tha ber berte an rawn chau zel ta a ni. Engvangin nge Judate hi hetiang em em a an fina, an thiama, an remhriata, an thluak a that bik em em ni le? Pathian hnam thlan an nih vang tih chu kan hre theuh a, chu chu tuntuma kan sawi tum a ni lova, Pathian hnam thlan an nih piah lama an inzirtir dan zawka hi tuntuma kan sawi tum chu a ni.

1939-1945 Khawvel indopui vawi hnihna hun lai khan khawvel mihring maktaduai 75  dawn laiin nunna an chan a, chutiang bawkin lal nunrawng Hitler avangin Juda mi maktaduai 6 velin nunna an chan bawk. Judate chuan tihduhdahna chi hrang hrang nen, lal nunrawng Hitler chuan an hnam nuai chimih tum mahse a hlawhtling lo a ni. Chutianga harsatna leh manganna khur thu tak atangin Judate chu an rawn chawr chhuak leh tho a ni.

1. NAUPANG AN ZIRTIR HNEH

“Hnam pakhat  hmakhua chu nupangte kut chhungah a awm a ni,” tih hi Juda mite chuan an hrechiang em em a, chuvangin naupangte chu a tha thei ang ber turin an enkawl a, naupang enkawlna kawngah hian an bei ngawrhin naupang hi an dah thupui em em a ni. Juda thufing pakhatah phei chuan, “Naupang kum 5 mi chu lal ang maiin enkawl la, Kum 10 an lo nih chuan sal ang maiin chhawr la, kum 15 an lo nih chuan i level pui anga enin thian tha ber a siam tum rawh” tih hi a ni.

A awmzia takah chuan, kum 5 mi an nih chuan mahni a engmah ti thei lo, mit khap kar leka chhe thei reng dinhmun a ding an nih hria a kei theih dawma kan dawm hi an mamawh a ni.

Kum 10 an nih atang chuan, in lam chet velah an tih theih awm tawk chu khawngaih leh ren miah lovin, an hmalam tan a ni tih an hriat theih ngei ngei tura zirtira chhawr tur a ni. Chu chuan an hma lan hun kal zel tura an hring nunah mahni inrin tawkna leh ka tive thei a ni, tih chu an nunah an vawng nghet tlat dawn a ni. Naupangte hi hmangaih luat avanga an hah hlauvin an thih theih tawk thil engmah tih tir lova kan awm hian, an mahni ah inrin tawkna an neih loh phah a, chu chuan an hringnun kal zel turah hlawhtlinna aiin hlawhchhamna, huaisen taka tih aiin dawizepna nun a thlen a, a tawpah chuan mi hlawhchham an rawn ni dawn a ni, tih hi Judate hian an hrechiang em em a ni.

Kum 15 an rawn nih atang chuan, an mahni a inrintawkna an lo neih theih nan thian anga kawmin a tul dan anga kan zirtir a hun ve tawh a ni. Zilhhauh vak vak a sawt tawh lova, vuak leh velhin awmzia a nei tawh dawn bawk hek lo. Kan zilh a kan hauh vak vak chuan, min hlau ang a, min hlauh avangin engmah an thiltih sawi ngam lovin a rukin thil an lo ti thin anga, chu chuan an hringnun mai ni lovin, kan inlaichinna pawh zawi zawiin a tichhe thei dawn a ni.

2. LEHKHABU NGAINA TURIN AN ZIRTIR

Judate chuan an fate chu mihring a nih an inhriat hma atang daihin Bible hi hmangaiha ngaina tlat turin an zirtir. Lehkhabu reng reng hi thil ngainat awm leh kawng min kawhhmuhtu a ni, tiin an inzirtir tlat a ni. Judate inah reng reng chuan, lehkhabu dahna hi an lu lamah hian an siam ngei ngei thin. Chuchuan lehkhabu hi a hmangaih mai ni lovin, an ngai pawimawh em em a ni, tih a lantir bawk. Zir chiangmi te chuan Juda naupang Kum 14 chung lam hian thlakhatah lehkhabu puitling pakhat tal an chhiar chhuak ngei ngei a ni, an ti nghe nghe.

3. SUM LEH PAI HI AN NGAIHLUA, AN ZAWNGA, AN KHAWL NASA EM EM BAWK

“Kan duhzawng tihlawhtling tur chuan sum leh pai hi a pawimawh ber a ni,” tih ngaihdan nei tlattu Judate chuan sum chu an ngaihlu a, an zawng nasa bawk a, theih tawkin an khawl bawk a ni. 2000 kuma Forbes in khawvela mi hausa ber a tarlan khan mi 40 zingah mi 18 te chu Juda mi an ni. Sum leh pai chungchanga Judate thufing pakhatah chuan, “Sum hi hmun tina a awm avangin, chhim leh hmar, chhak leh thlangah zin chhuak rawh” tih ngaihdan neiin khawvel hmun hrang hranga in zarpharh in Judate chuan sum hi an zawng nasa em em a ni. “In pakhata thil i va zawrh reng rengin nu ber chu a bika dahin zawrh tum rawh” chhungkaw mamawh zawng zawng hretu chu nu an nih tlat avang leh chhungkaw mamawh bazartu ber chu nute hi an ni, tih thuruk chiang taka hretu Judate thil zawrh dan a ni.

Mi zawng zawng mamawh leh rate tla ngai lo chu, mihringte eiin hi a ni, tih hi Judate chuan an hrechiang em em bawk a. Mahni duhzawng leh phur zawnga sum zawng mi a ni lova, mihringte hian hemi hun leh hmunah hian engnge an mamawh a, tih hriat tum hmasa in sum zawnna hi an nei thin a ni. Hetiang avang hian a ni, khawvel a mifing, mi thiam, mi remhria leh mi hausate zingah Juda mi an tam em em na chhan chu ni.