Blog
KUM 2023-A KRISTIANTE TANA RAM RALTI ZUAL TE
– North Korea ram chu Kristian tihduhdah nasat berna ram ni leh ta!
– Kum 2022 chhungin Kristian 5600 chuang an martar
– Biak In 2100 chuang beih a ni
January 19, 2023: Open Doors, USA chuan khawvel ram hrang hranga Kristiante tawrhna ram leh tihduhdahna thlen dan tehfung hrang hranga an tehna (Open Doors World Watch List 2023) atangin North Korea ram chu Kristiante tana hmun ralti ber a ni. Kum 2022 khan Afghanistan chu Kristiante tana ram him lo leh ralti ber a ni thung a, North Korea hi ranking no 1-ah kum 10 chuang fe a zawna awm tawh an ni. Nikum lama Ranking no 1, Afghanistan chu kuminah chuan 9-naah a tla thla a, North Korea ram chu 1-naah a chho leh ta a ni.
Kum kalta 2022 chhung khan khawvel hmun hrang hrangah Kristian 5600 chu Isua avangin an martar a. Biak In 2100 chu khar leh beih tawk an ni. Kristian 124000 chu Kristian an nih avangin tihluihnaa hnawhchhuah tawk an ni. Mi 15000 zet chu an raltlan phah nghe nghe.
Kristian Maktaduai 360 zet chu tihduhdahna leh nekchepna nasa tak (high levels of persecution or discrimination) tuar mek an ni. Chu chu khawvel puma Kristian 7 zela pakhat ang an ni phak. Africa-ah chuan Kristian 5 zela 1 ang an ni a, Asia-ah chuan 5 zela 2 ang an ni phak. India ram pawh Kristiante tana hmun him lo 11-na a ni phak hial!
Open Doors report hi Oct 1, 2021 atanga September 30, 2022 inkara thil thleng, Open Doors thawktu 4000 chuang, ram hrang hrang 60-a awmte report atanga khaikhawm leh ranking hi siam a ni. Open Doors report danin Kristian tihduhdahna leh an chunga hleilenna hi a nasat ber tum a ni.
2023 WORLD WATCH LIST TOP 10
1. North Korea
2. Somalia
3. Yemen
4. Eritrea
5. Libya
6. Nigeria
7. Pakistan
8. Iran
9. Afghanistan
10. Sudan
Khawvelah Kristian tihduhdahna hi a hluar zel, zalen taka kan awm lai hian kan ringtupui harsatna leh tihduhdah tuar mek te tan i tawngtai thin ang u.
……………….
C. Lalnuntlinga, Editor, Christian Outlook
Sources -Open Doors, USA, Christianity Today, Christian Headlines etc
MEL GIBSONA’N ‘PASSION OF THE CHRIST’ CHHUNZAWMNA ‘THAWHLEHNA’ TIH FILM SIAM LEH MEK
Isua Film hlawhtling berte zinga mi, ‘Passion of the Christ’ siamtu- Actor, Director leh Producer ni bawk, Mel Gibson chuan ‘The Passion of the Christ: Resurrection’ chu tichhuak mai turin a buaipui mek a. Tun atanga thla rei vak lovah hian tihchhuah mai a tum thu a sawi.
Isua Thawhlehna Film chhuak turah hian Isua khenbeh a nih atanga a thawhleh ni, ni 3 chhunga thil thleng hrang hrangte tarlan a ni ang. He film-ah hian Jim Caviezel chu Isua lemah a chang leh ang a, Maia Morgenstern chu Mary, Christo Jivkov chu Johan, Francesco De Vito chu Petera lemah te an chang leh ang. Braveheart screenwriter, Randall Wallace chu screenplay ziaktu a ni bawk.
‘The Passion of the Christ’ kum 2004-a tihchhuah kha Dollar Maktaduai 30 chauhva siam ni mah se, Box Office-ah ringawt pawh US Dollar Maktaduai 612 zet a hlawh chhuak. USA-a Evangelical Christian pawl hrang hrangte chuan Hollywood film chhuak ropui ber zingah an ngai hial a, tuna chhuak leh tur pawh hi an nghakhlel hle tawh nghe nghe.
‘The Passion of the Christ’-ah khan Isua Kross-a khenbeh a nih a, a thih hma darkar 12 chhunga thil thleng. Isua lungngai taka Gethsemani huana a tawngtai lai atanga intan a ni. Tunachhuak tur erawh chua Isua khenbeh a nih hnu leh a thawhleh ni, ni 3 chhunga thil thleng tarlan a ni thung ang.
……………….
C. Lalnuntlinga, Editor, Christian Outlook
HEMI 5 ZINGAH ENGNGE PAWIMAWH BER?
By: Victor Zika
Kan hringnun-ah hian nitina thlah miah lova kan vawn tlat tur thil panga a awm a, chungte chu,
1. Chhungkua (Family)
2. Friend (Thian)
3. Health (Hriselna)
4. Spirit (Nuna)
5. Work (Hna)
Hemi thil pangate hi kan vuan rei tial tial a, number 1- 4 chu darthlalang no (Glass) ang mai lo niin, Number 5 na hna erawh Ball ang a lo ni.
Hemi nitin a kan vawn tlat tur thil panga zinga 1-4, darthlalang no (Glass) ang kan tih theihte chu, Chhungkua, Thian, Hriselna leh Nunna te an ni a, kan tihtlak palh vaih chuan a keh ngei ngei dawn a ni. Chu mi keh tawh hnu chu chhar khawm lehin han remkhawm tha leh mah ila, kan tihkeh hma angin ngai a awh tawh miah lovang. Chu mai bakah kan chhar hmaih a awm chuan, rah fuh palh a hlauhawm em em bawk a ni. Hemi pali Chhungkua, Thian, Hriselna leh Nunna hi kan tih tlak palh vaih chuan, khawvelah engmah rengin a ai an awh zo dawn lo a ni.
Mahse, Number 5 na ball ang ani kan tih tawh kha. Ball hi kan kut a ta titla mah i la, a keh ngai lova, kan kut chhungah bawk a rawn letleh thin a ni. Chutiang bawkin kan nitin hna hi pawimawh hle angin lang thin mahse keh thei thil anga ngaih tur erawh a nilo. Engemaw avangin kan nitin hna chu thawk thei tawh lovin chan mah ila, thawh tur hna dang a rawn awm leh tho ang.
Hna hi hmun khatah remchang lo mahse, hmun dangah a aia remchang zawk hi kan hmu fo a ni. Mahse Chhungkua, Thian, Hriselna leh Nuna erawh vawi khat i tih tlak vaih chuan damchhung inchhiarna a ni dawn a ni.
“Lalpa Chhungkua, Thian, Hriselna, Nunna leh nitin thawh tur hna min pe a ka lawm e. Ngaih pawimawh zawktur min hrilh zel la, ngawih pawimawh dan kawng min zirtir la, he ka nuna thil pawimawh tak tak pangate nena inhmangaih tawn dan nitin min zirtir ang che”
Amen.
Note:- He thu hi, Coca Cola CEO Brain Dyson in a, Georgia, Tech Confferience-a a thusawi nghahchhana ka rawn ziah a ni e.
ARK ENCOUNTER CHANCHIN TLANGPUI
By: Dr. Ro Dinga
Nova lawng tia kan hriat lar, “Ark Encounter” hi Grant County, Kentucky State, USA a Christian thurin leh Pathian thilsiam entirna hmun a ni a, 2016 ah hawn a ni. Park nuamtak chhung lailitakah Bible Genesis a ziak “Noa Lawng” Pathian Thupek ang ngei a kum 40 a tuk, tuilet laia an humhimna ang chiah mai chu an siam a, a ding ‘lurh’ mai a ni. He lawng hi feet (510) a sei; avang lam feet (85); a san lam feet (51) a ni. Indianapolis atangin miles 160 vela hla a ni a motor in darker 3 kal vel a ni.
He ‘Ark Encounter’ din leh neitute hi “Answers in Genesis (AiG)” group an ni a, “Young Earth Creationist (YEC)” tia hriat an ni bawk. AiG hian Ark Encounter atanga miles 45 a hla, Petersburg, Kentucky state ah “Creation Museum” an nei bawk a, Pathian in leilung leh a chhunga awmte a siam dan Bible a ziak anga entirna Museum a ni. AiG hian Bible zirna leh hrilhfiahna ‘Website’ thra tak an nei a, Training leh Course-te an buatsaih bawk. ‘Pathian in engkim a siam’ tih ringhleltute leh an zirtirnate chu Bible tlawhchhana hrilhfiahna lamah AiG hian an thawhhlawk hle a ni.
Ark Encounter an sak dawn hian Kentucty state sawrkar chuan ‘Tourism’ lamah state tan atangkai dawna an hriat avangin city, county leh state atangin ‘tax’ an hniam (tax incentives) a, an sak zawh hnua a chhunga thawktute chu ‘Pathian ka ringe’ tia (Sign statement of faith) an sign tir avangin Pathian ring lotute beihna an tawk nasa hle a, Court a khin an ni nghe nghe a ni. nimahsela, U.S. Federal Court in 2016 ah AiG hi thiam a chanter zawk ta a ni.
Lawng hi chhawng 3 a ni a, feet 18 a sang, pindan (bays) 132 awm a ni. Tlawhtute chu a hnuai ber chhawng atangin an lut a, a chung ber chhawng thlengin a lawn theih a ni.
A hnuai ber chhawngah hian tuilet laia Lawng chhunga an phurh ni awma an rin ransa lemte an dah a, Chhawng 2-na ah chuan ransa limte bakah Noa’n Lawng a tuk lai entirna hmanrua chi hrang hrang leh an chhungkaw awmdan tur vel an dah a ni. Chhawng 3-na ah chuan tuilet laia boruak leh thil awmdante entirna an dah a ni.
Lawng hi lei atrangin feet 15 a kam/chawi san a ni a, concrete ban hmanga chawi san a ni. Lawng hma lam chu feet 80 a sangin an siam a, khawthlirna rem tak siam a ni bawk a ni.
BULTAN DAN
December 1, 2010 ah YEC/AiG chuan Ark Encounter hi siam tumna ruahmanna an siam a “Bible a ziak angina, khawvel pumpui tuilet laia Noa leh a chhungte, ransa zawng zawng an him theihna, Pathian in a tuk tir ngei LAWNG chu feet 500 a sei in I siam ang u” an lo ti a ni. February 2012 ah a hmun hi an lei a, Bible a Noa Lawng awmzia an zirchianga, a ang taka sak an tran ta a ni.
Cary Summers-a chu he Lawng ‘design’ ziaktu a ni a, Patrick Marsh-a (Creation Museum design-tu) in a puibawm a. “The Troyer Group” Indiana state Mishawaka khua a in satuten an sa. Amish builders ho tihdan ang ngei in thing hmangin an sa a, mistiri (craftsmen) 1,000 chuang in an sa.
HAWN NI leh TLAWHTUTE
Ark Encounter hi July 7, 2016 ah hawn a ni a, hemi ni 7/7 (July 7) hi Genesis bung 7, chang 7 (Gen 7:7) “ Tui a lêt dâwn avângin Nova leh a nupui chu, an fate leh an nupuite nên lawngah chuan an lût a” ziak hi tlawhchhan in July 7 hi “Hawnni” atan an thlang a ni.
AiG chuan a hawnni atangin ni 40 leh zan 40 chhung chu chhun leh zan chhunzawmin an hawng (open) a, hei hi Bible a ni 40 leh zan 40 ruah sur kha an entirna a ni. An hawnni ah chuan AiG member-te, sum thawhtute (doners) leh chanchin mite (media) 7,000 hnenah a thawlna luhna ticket an pe a. An hawnni atrangin ni 6 chhungin mi 30,000 in an tlawh. Ni 1 ah mi 5,000 zelin an tlawh tihna a ni.
AiG chuan kum 1 ah tlawhtu 1.4 million atrangin 2.2 million an neih an beisei a. Nimahsela, 2017 khan 1 million vel in an tlawh niin AiG thupuan chuan a sawi. Grant county sawrkar chuan July 2017 atangin June 2018 thleng khan he hmun tlawhtu 862,471 an awm niin an puang a. Grant county thupuan hi luhman (fee) pet e chauh an chhiar avangin a dik lo deuh niin AiG chuan an sawi a, kum 5 chin hnuai lam naupangte a thlawmna luhtir an ni a, kum 1 chhung tan ticket lei (annual pass) leh dam chhung tana daih ticket lei (lifetime pass) an chhiar tell oh avang a ni an ti.
Engpawh ni sela, Ark Encounter hian kum 1 ah tlawhtu million 1 (nuaih 10) a nei a nih hi.
