By James Vanlalruata

Daniela lehkhabu Bung 12:4-ah chuan hun hnuhnung a hriatna nasa taka a a lo pun tur thu hi chiang takin kan hmu a ni. Tunlai thalaite nuna pawimawh leh kan hman nasat ber te chu internet leh a kaihhnawih dangte hi an ni awm e. A hmang ngailo pawhin a tangkai zia leh thil tih theih zia chu kan hre vek awm e. Computer science thiamna lo pun dan te, medical lama thiamna te( nu pum chhunga naute pawh an lo zaithei tawh a ni), Science thiamna dang, nuclear ralthuam hlauhawm zia te, Atlantic tuipui chhunga khawvela rel chak chi tlan tir tum thu te,
khawvel piahlam ram planet dangah awmna zawng thei tur khawpin thiamna a lo sang ta hle a ni.Heng thiamna leh hriatna lo pung zel hian kan tunlai khawvela kan ringtu nun leh thalai nun pawh nasa takin a her danglam mek zela, heng thil pali atang hian kohhran hote kan him theih nan tawngtai chung zelin hmalam pan zel i tum ang u.

a) Individualism:
Mahni chauh inngaihsakna, Mahni in ngaih pawimawh berna, midang mamawh lo a inhriatna tiin kan sawifiah thei awm e. Mithiam te chuan,”Human beings are social animal” tiin mihring nun hi an lo hrilhfiah a, inmamawh tawna chengho nunho inzirho tura duan leh siam kan ni.Mahse chu chu tunlai khawvelah chuan a lo letling ta daih  mai, a huhova thiltih nuam ti thin khan kan thil neih leh khawvel thil lo changkangchho hian midang mamawh a  inhriatna a ti tlahniam a. Thalaite Kohhran leh pawlho a kan chetna thlir hian chu chu a tilang chiang hle in a hriat
ani. Tunlai thalai zinga kan natna hriat lar leh min tibuaitu pakhat chu depression(nguina) kan tih te pawh hi a ni awm e. Heng natna sawifiah thiam si loh, lo awm mek ta te hian mahni nunna pawh zahzo lovin mahni kan lo intihlum fo ta mai. Kan ramah ngei pawh a chhan hriat mang si lova  mahni intihlum kan lo tam ta hle mai. Heng nunah te hian kan tluk luh lohna turin thalai te Kohhran leh pawlho rawngbawlna ah te hian kan mawhphurhna te hlen zel chungin theih tawp chhuahin rawng i bawl zel ang u.

b) Its my life:
Kan tlangval ve lai 90’s chho velah khan Band lar tak Bon Jovi ho khan Its My Life tih hla hit tak mai an nei a. Tunlai thalai nun nen a in hmah em vang nge? a hunlai chuan thalaite hla duh ber a tling hial awm e. Thusawitu tam tak pawhin he nun hlauhawm zia leh tunlai thalai nun tehkhin nan an hmang fo thin. Kan tleirawl leh awmtha duhlo te chauh nghawng lovin, kan rawngbawlna pawh nasa takin min nghawng zel dawn a ang ta hle mai. Heng lakah hian Kohhran hote kan fimkhura rawngbawlna peng hrang hrang a hlawhtlin theihna tura ke pen hi kan tih
makmawh a ni tih i hre thar leh ang u.

c) Kohhran hrefiah tawk lo:
Tunlai hunah hian Kohhran awmzia leh nihna hriat fuh tawk loh a vangin, piangthara inchhal zingah pawh Kohhran ngainep deuh tlat an awm niin a lang. Kohhran a rinawm lo tan chuan ringtu nun hi zawh a har hle a, Pathian thuah te pawh tui viau mahse nun ziktluak lo a awm tlat thin. Mi tam tak erawh chu kohhran rawngbawlna leh NGO te hi kan hriat pawh ta nawk niin a lang, Para church rawngbawlna te pawhin kan rilru a tibuai fo awm e. Kohhran leh Isua Krista inzawmna hi a thuk hle mai a, Kohhran hi Krista taksa a ni a, Isua tana kan rinawm dawn chuan a taksa kohhranah kan rinawm a ngai a ni. DL Moody-a chuan, “Mi in Kohhran hi nu anga an en theih loh chuan Pathian hi Pa angin an en thei lovang,” a lo ti a ni. Kohhrana rinawm zel hi ringtu rawngbawlna dik tak a ni tih kan hriatchian fo a pawimawh awm e. Tunlai hian Khawthlang ramah neih inang (Gay leh Lesbian) te pawh sakhaw puithiam turin an lo nemnghet ta mek a,chu chuan Kohhran inthenna leh inlungrual lohna a thlen mek bawk. Heng te hian kohhran min hmuh nep tir lo se a duhawm hle mai.

d) Materialism:
Khawvel pen rualin kan khawsak dan pawhin ke a pen ve zel a,kan eizawn dan(kan work culture) pawh nasa takin a inthlak thleng mek bawk. Company leh Agency kan hriat ngai loh te kan hmu thar zut zut mai. Heng thil ropui tak tak leh hausakna te hi kan hmang tangkai tur a ni a, mahse khawvel changkanna leh hausakna ringawt thlir chunga kan kal erawh a him miah lovang. Min hringtu Walsh Kohhran kan sawi thin heng, Biakin hralhte, Pathianni leh kristiante ni serha inkhelh ropui te, Thalai inkhawm tur awm tawh lo te, kan hmachhawn thei ve a ni tih hre
chunga rawngbawltuten thahnem ngai zawk a rawng kan bawl zel a tul ta tak zet mai.
“Nang erawhchu engkimah fimkhur la, hrehawm tuar la, Chanchin Tha hriltu lam hna thawk la, i rawngbawlna kha hlen rawh.” – II Tim – 4: 5