Beidawnna-in A Hneh theih Loh Rumruhna (The History of Brooklyn Bridge)

Khawvela leihlawn mawi leh hmingthang zinga tel pha USA a awm New York leh Long Island inkar leihlawn chanchin hian nun beidawng leh kal ngaihna hre lo te tan chakna a thlen thar ngeiin ka ring. He leihlawn hi, Feets 1,595 a sei, feets 276.5 a sang, America rama leihlawn hmingthang an dawh hmasak berte zing a mi, 1869 – 1883 kum 14 chhung meuh an buaipui chanchin hi han chhiar la, i nunah chakna thar a thlen ngei ka beisei.

John Roebling-a hi Engineer thluak tha zet, mi remhria leh ngaihtuahna hmang mi tak a ni a, New York leh Long Island inkar chu lei nalh zet mai dawh a, motor-a inkalpawh theih niin a hria a. Nimahsela a ngaihtuahna chu thil tihpuitlin harsa tak tur a ni tiin khawvela lei dawh thiam rual chuan an hrilh a. Rilru seng hah lo tur leh theihngilh hmiah zawk turin an rawn a ni.

Mahsela Roebling-a chuan a suangtuahna chu a theihnghilh mai thei lova, lei mawi tak mai a dawh theihin a ring tlat a. A tawp a tawpah chuan a fapa, engineer zir chhuak hlim chu a hmin thei ta hram a.

An pafa nen chuan lei dawh dan tur chu an ngaihtuahin ruahmana an siam tan ta a. A thawktu tur mi an ruai bawk a, phur takin an hmaa chona lian tak mai tipuitling tur chuan an thawk tan ta a.

Lei dawh hna chu a kal tluan hle lai chuan an hnathawhna hmunah chuan tawhsual rapthlak tak an tawk ta hlauh mai a, chutah chuan a bultumtu leh ruahmantu ber Roebling-a chuan a nunna a chan a. A fapa, Washington-a pawh chu a lu-ah hlaiam na tak tuarin, a taksa a chet theih loh phah a, tawng pawh a tawng thei ta lo a ni.

Mi reng reng chuan, ‘Ka tih reng kha’, ‘A atthlak reng a ni’, tiin an pafa chunga thil thleng chu a tha lo zawng hlirin an sawi tluar tluar a. Lei dawh hna pawh chu an pafa bakin a chinchang an hriat loh avangin hluihlawn mai chi niin an hre hlawm a. Amaherawh chu a fapa Washingtona-a chu a ngaihtuahna a la fimin a pa nen an hna thawh chu puitlin a la chak zek zek mai si a.

A thiante chu han chawh phur a, an hna thawh lai chhunzawmtir a duh em em a, mahse anni chuan an huphruh em em mai bawk si. Damdawiin khuma a mut lai chuan tukverhah ni zung a lo lut riai riai a, thliin parda a chhem len karah chuan pawnlam chu a hmu thei a. Chutia van boruak leh thingte a hmuh chuan thu ken an nei tlatin a hria a. Vawilehkhatah a rilruah tihdan tur a ngaihtuah chhuak ta phawng mai. A kutzungtang pakhat a tiche thei, chumi hmang chuan han a thawk thei dawn a ni. A kutzungtang hmang chuan a nupui nen inbiakpawh dan an zir chhuak ta a.

A kutzungtangin a nupui ban a va khawih a, chu chu engineer-ho ko tura a tihna a ni. Chutiang zel chuan a kutzungtang leh a nupui hmang chuan tih tur a sawi a, lei dawh hna chu an tan leh thei ta a. Kum 13 chhung chutianga lei dawh hna an thawh hnu chuan lei hmingthang leh mawi tak, BROOKLYN BRIDGE chu zawh theihin an lo peih ta a ni.

Vawiin thlenga la ding Brooklyn Bridge hian mi pakhat, rilru hnual thei lo, beidawnna in a hneh theih loh mi tumturh, harsatnain a hnehtheih lo a lantir a, engineer-ho thawhhona tha tak a lanchhuah tir bawk a ni. Washington-a nupui inpekna ropui tak, hmuh theiha entirtu a ni bawk a ni.

Brooklyn Bridge hian suangtuahna puitlin theih loha ngaih pawh tumturhna leh tih hram hramna kan neih phawt chuan kan puitlin thei zel a ni, tih min entir a ni.

” Hlau suh u, Kei in hnenah ka awm si a; mangang suh u, Kei in Pathian ka ni si a. Ka tichak ang che u a, a ni, ka tanpui ang che u; ka felna kut ding lamin ka chelh reng ang che u.” Isaia 41:10

By:- Victor Zika

Thulakna:- Internet “Wikipadia”, “A collection of Inspirational Short Stories” (Nun chawmtu Vol. 2)

Comments are closed.