Immanuela thi zamah tih hla phuahtu WIILLIAM COWPER-A Chanchin ngaihnawm

 

“Beram no hmelhem lo leh bawlhhlawh kai lo thisen anga Krista thisen hlu chuan tlan in ni zawk tih in hre si a,” 1 Pet. 1 : 9.

Immanuela thizamah tih hla phuahtu William Cowper-a chanchin i han sawi ve hlek teh ang, he hla thu a phuah dan chanchin chipchiar erawh kan hre tamlo hle.

A tet lai : Berkhamsted, Hertfordshire, England-ah November ni 26, 1731 khan a lo piang a. A pa chu John Cowper-a niin a nu chu Ann Cowper-i a ni. A pa hi Churh of St. Peter-ah Pastor a ni a. A nu leh pa hian fa an nei vanduai a, fa pasarih an neihah Williama leh John-a chiah an dam a ni. A nuin John-a a hrin hian raichehin a thi a ni.

Sikul kal lai : Kum 6 mi a nihin a nuin a thihsan avangin a tuar nasa hle a. Kum 1742-ah Westminster School-ah a lut a, naupangte niin Latin țawng a zir a, a thiam chho ta hle a, awlsam takin a letling thin. Nu thihsan a nih vangin a aia upa ten an tituhdah hle țhin a, mahse, chhel takin a zirlai a zir tlauh tlauh țhin.

A patean nupui neih a phal lo : Westminster Sikul ațanga a zir zawh hnuin dan lam zir turin a inpuahchah a, a patêa Bob Cowper-a hnenah a khawsa a. A patea fanu Theodora-i nen an inngaizawng ta a, inneih hial pawh an duh a, mahse a patea chuan thisen zawmpui inhnaih lutuk inneih a phal lo va; an innei thei ta lo va. Hei vang hian William Cowper-a rilru a na hle a ni.

Intihhlum a tum : Dan lam a zir zawh hnuin kum 1763-ah House of Lord-ah a thawk dawn a. Heta thawk tura exam a neih laiin a rilruah harsatna namen lo a tawk a, an lak loh phah a, rilru lam natna depression leh anxiety a neih phah ta a. A chunga thil thleng te a ngaituahin a rilru na avanga hrehawm reng renga a awm avangin vawi thum lai mahni intihhlum a tum a, mahse a hlawhchham vek a, Pathianin intihhlum chu a remti lo niin a ngai ta a ni.

A piangthar ta : Hetiang taka harsatna a neih avang hian St. Alban’s Hospital-ah enkawl a ni a, Dr. Nathaniel Cotton chuan hmangaih leh duat takin a enkawl a. Heta a awm lai hian Cowper-a chuan damdawi in bul huana Bible let reng chu a hmua, he Bible hi nasa takin a chhiar a; amah tlantu Isua a lo hlat tawhzia te, a malsawmna tam tak a lo hnar tawh dan te leh Pathian hmangaihna leh venhimna a dawn nasat dan te inhrechhuakin a piangthar ta a ni.

A depression a reh : A depression enkawltu Dr. Nathaniel Cotton-a nen an inngaina em em a, engemaw chen an inenkawl hnuin a depressio zualpui a reh a, tichuan Huntingdon-a pastor pension Rev. Morley Unwin-a bulah a awm leh a. Pastor nupa hian nasa taka enkawla an kawmngeih zel hnuin zawi zawiin a depression pawh a reh ve ta zel a ni.

John Newton-a hnenah : Kum 1767-ah Rev. Morley Unwin-a chu a thi a, a thih hnu hian “Khawngaihna mak, mawi leh duhawm” tih phuahtu John Newton-a chuan Rev. Morley Unwin-a thihsan tak a nupui fanau te leh an enkawl Wlliam Cowper-a chu Pastor hna a thawhna Olney khuaa a bula cheng ve turin a sawm a. A sawm angin a hnenah an awm ta a. Naupan laia nu te thihsan ve ve, hlaphuah kawnga tui ve ve an ni bawk a, an inkawmngeihin an inzui chawt mai a, John Newton-a chu William Cowper atan Pastor, țhian țha leh fuihtu țangkai tak a ni.

Hlabu an siam : John Newton-a chuan Cowper-a talent chu a hriatsak vek a, hlabu a siam lai mekah hla phuah ve turin a sawm a. Hla chi hrang hrang an phuah dun ngat ngat a, an peih fel hnu chuan hlabu hmingthang tak Olney Hymns chu an tichhuak ta a ni. He hlabuah hian John Newton-a hlaphuah 208 leh William Cowper-a hlaphuah 68 a awm a, kum 1779-ah an tichhuak a ni. Cowper-a hun kal tawha a nun beidawng leh Pathian ngaihsak miah lo va a lo khawsak hun lai tea Pathian khawngaihna a chan nasat zia leh Pathian thisenin a sual a tlenfai thu te a ngaihtuahna atanga he hla Immanuela thi zaman tih hi a phuahchhuak a ni.

A hun tawp lam : Kum 1780-ah John Newton-a chu Lombard Street-a Pastor hna thawk turin a pem a, a pemsan hnu hian Cowper-a chuan hla phuah lamah nasa takin hma a la zui a, kum 1780 -1786 chhung chu a hla phuah tam ber hun a tih theih. Kum 1782-ah ama puala a buatsaih hlabu hmasa ber “Poems by William Cowper of the Inner ‘Temple’ tih chu a tichhuak a. Hemi hnu hian hla tam tak phuahin novel te a letling bawk a, hmun hrang hrangah a insawn kual țhin a ni. Kum 1800 kum tirah natna chi khat Edema a vei ta a, chu natna chu tuar chhuak zo lovin April ni 25, 1800 khan kum 68 mi niin East Derham, Norfolk, England-ah a thi a, St. Thomas of Canterbury Biak In sirah a ruang hi an phum ta a ni.

Source : Makedonia, Lunglei

Comments are closed.