No comments yet

Billy Graham-a Hnen Atanga Zirtur

By:  Victor Zika

Mihring damchhung hi a rei lo em em a, chuvangin kan damchhung hun rei lo te hi, a tha thei ang-bera kan hman thiam a pawimawh a ni. Pathianin he khawvela a chanchin tha hril tura a ruat zinga tel, mi ropui—Billy Graham pawhin a lehkhabu ziak hnuhnung ber “The Journey” ah chuan kan damchhung hun tawite hi thiam tak leh tangkai taka hman thiam theih hi a pawimawh ber zia hriain, a ziak chhuak nghe nghe a ni. Tuntumah hian Pathian ropuina atana nun kawng kan zawh meknaah min tanpui theitu a nih beiseiin “Readers Digest” Magazine enkawltute’n Billy Graham an kawmna a, a thuchah hnuhnung ka rawn ziak chhuak ve dawn a ni.

1. Midang te nena inrem taka lendun hi, mihring pakhatin a tum tlat tur thil chu a ni.
Midang te nena inrem taka lendun hi thil ni thei tak tak a ni em? tih hi zawhna awm thei thil a ni. A lungchhiat thlak khawp mai. Heihi thil ni thei a ni lo reng reng. Engvangnge tih chuan, keimahni lam atangin engtiang khawpin inrem tumin theih tawp chhuah thin mah i la, midang te thinlung hi kan ti danglam thei chuang lo. Chuvang tak chuan Pathian kan mamawh a ni. Pathian chu tihdan tur kan zawtin a hnenah kan hlan zawk tur a ni. “Engnge keima lamah dik lohna awm?” tih chu Pathianin a hriattir mai ang che. Kan diklohna leh kan thiamlohna chu hria a, ngaihdam kan dil thin hian hlawhtlinna kawng a rawn inhawng tan dawn a ni.

Khawvela kan cham chhung hun rei lo teah hian, kan hun te hi a ni lo lama hmangtu ni lovin, Pathian ropuina atana thawka nung tur hi kan va ni teh reng em!!! Pathian hnen atanga thlamuanna thilthlawnpek kan dawn leh Pathian lawmzawng mi kan nih hi he khawvela kan damchhunga thil pawimawhber a ni. Kum sawm chuang ka nih atangin, Krista chu ka ring a, ka rin tantirh atanga tun thleng hian zingtin Pathian nena inpawl thei reng turin ka hun ka pe reng a ni. Chuan Bible hi ka chhiar thin a, Bible thu awmzia chu hre turin ka ngaihtuah reng thin bawk. Thlarau nena lendun aia thil pawimawh dang hi ka nunah hian a awm thei lo a ni.

2. Mi’n i chunga an tiha i duh tur ang apiang chu, mi chungah pawh ti ve ang che.
He thu inhngahna ber chu kawng danga kan sawi chuan, Isua Krista Golden Comment (or) Golden Rule Mtt.7:12 thu a ni. Isua Kristan a sawi anga kan zawm chuan kan nunah hian danglamna mak tak a lo thleng ang.

Kan Bible pawhin “thinlung taka inngaihtlawmna hi finna a ni” tiin min hriattir bawk. Nitin ka nunnaah hian midangte ang bawkin sualna nei mi ka ni tih hi ka inhre reng a ni. Chu ka sualna chu Pathian khawngaihna atang chauh a ngaihdam ka ni. Pathian chuan kan zavaiin thiamtheihna, finna leh hriattheihna chu a khawngaihna chuan min pe vek a ni. Theih tawp chhuaha that kan tum fan fanna chungah Pathian pawhin mal min sawm bawk a ni. Hemi thuah hian mahni leh mahni in ngaisang lo turin kan thinlung kan dah hniam a pawimawh bawk. Mahni leh mahni in ngaisang mi leh mi chapo miin Pathian chu dik takin an be ve thei lo. Mahni leh mahni in ngaisang mi leh mi chapo mi chuan, a tlinlohna leh a thiamlohna reng reng a hmu thei si lo.

Chuvangin, I thiante tana tawngtai sak a pawimawh ang bawkin, nangmah dokalhtu, hawtu, ngaineptute tana tawngtai sak hi a pawimawh lehzual a ni. Min hawtute leh hmelma tana tawngtai sak hi, Pathian duh zawng leh min zirtirna kawng chu a ni.

3. I lei veng tha rawh, I lei atangin thil tha leh thil hlu chhuah tir ang che.
Pakhat leh pakhat sualna inzawnsak a, inmawhpuhtawnna hian chhungkaw kehdarhna te, then leh rual, pawl leh khawtlang inthendarhna te a rawn thlen tir thin a ni. Mahse, chutiang thil thalo sawi thin LEI pawh hi, thil tha sawina atana kan hman chuan LEI manto tak leh hlu takah a lo chang thei bawk. Chuvangin, kan lei hi thil tha sawi nan a hmang turin tumna kan neih tlat a ngai a ni.

Ka thil hmuh-leh-tawh thinte zingah hian, mi tam takin harsatna chi hrang hrang an tawh avanga thurawn pe tura tanpuina min rawn dil thin hian, Bible thute hmangin an hnenah fuihna thu ka lo pe thin a ni. Bible hi rangkachak khur zo thei lo chu a ni a, i lai thuk tial tial ang a, aman sawi hleih theih loh khawpa thil hlu chu i lai chhuak mai ang. Thurochhiah pakhat chuan “I hmui a tangin hlawkna leh tangkaina nei lo tur thil reng reng chu sawi chhuak suh ang che”. Midang tana malsawmna leh hlawkna, midang tana thlarau lam thanlenna tur tawngkam sawi la, i thlarau hlawkna leh thanlenna i hmu zel ang. Mahni leh mahni kan inenfiah zel a ngai a ni. Midangte tana malsawmna leh thatna tur tawngkam sawi chhuah tum la, sawi chhuak thin bawk ang che.

4. Thil tha lo chu, thil tha lovin thungrul mai suh ang che.
Thil tha lo tih hi sual a ni. Kan thinlung chhungah hian thil tha lo sual tih duhna hian Cancer natna ang maiin zung a nei nghet em em mai a ni. Thilsual kan tih hian, kan ngaihtuahna a kal sual avanga ti kan ni lova, chu thil tha lo chu kan hriat loh avanga ti kan ni bawk hek lo. Kan thinlung chhungah hian thilsual tih duhna hi a awm ve reng reng a ni.

Chu thil tha lo ngaihtuahna zawng zawng hi Setana hnen atanga lo kal a nih zia kan Biblein chiang takin min hrilh a ni. Setana hi a lo awm tak tak a ni. Chu Setana chu Pathian nena inkalh tlat an ni. Mahse, kan thil tih sualna zawng hian Setana hi mawhpuh vek erawh chu thil dik ber a ni bik lo. Kan thiltih sual chu keimahni ngeiin a mawh kan phur tur a ni. Engvanginnge thenkhat te hian chu thil tha lo chu an tih chhunzawm zel ni ang le? Engvanginnge thil tha awm reng chunga an tih theih loh ni ang le? He thil awm dan hi ka hriatthiam theih loh zawng a ni. Engvangnge tih chuan thil tha lo titute tawpna chu chhiatna rapthlak tak a nihzia chiang taka ka hmuh thin vang zawk a ni.

5. Hmelma chu hmelma anga en lovin, thil kal liam tawh chu theihhngilh zawk ang che.
Mi pakhat hian kan chungah thil tha lo tiin kan pawi khawih se, chu mi chu dan angin a chungah rorelin thiam loh kan chan tir thei a ni. Chu dan chu kan zavai atan inhumhimna a ni. Mahse “min tih nat avangin, ka ti na ve ngei tur a ni” tia ngaih dan kan neih chuan a dik lo a ni. Thil kal liam tawh chu remthat leh theih a ni lo. Kan sualna leh kan batte zawng zawng chu Pathianin min ngaihdam ang bawkin, min ti natu leh dik lo taka kan chunga titute chu kan ngaihdam theihna tur kawng zawn hi ringtuten kan tih tur chu a ni.

Ka chunga thil ti sual, dik lo taka min puhtute leh midangte hnen atanga thil tam tak zirchhuah hi ka tih thin dan pangngai chu a ni. Keini hi sualfate kan ni. Pathian nen kan inhlat bawk thin. Mihringte hi engtianga awm tur nge kan nih? engtianga nung tur nge kan nih tih hi Bible atanga inenfiah reng hi kan tih tur a ni. Mawtor nena khual zin turte hian an zina kawng hrefiah lo leh map nei chiang lovin khual an zin ngai lo. Chu map chu thingrem chhungah chahbi kalh tlatin an dah ngai lo. Chuvangin, kan nun inenfiahna atan leh kan map Bible chu i hmang tangkai ang u. Nitin kan nun kawng min kawhhmuhtu atan Bible hi kan chhiar reng thin a tul a ni.

6. Ngaihdamna thinlung kan neih a tul a ni.
“Sual hi ka hua a, sual fate erawh chu ka hmangaih a ni” tih ngaihdan hi, a tak ngeiin ka nun pui a ni. Mitin hian he thu hi a takin nun pui se tih hi, ka duhsakna a ni. Kan nunpui nge, nunpui lo tih hi Pathian in min en reng a ni. Pathian hian sual chauh a hua a ni. Mahse, sual fate erawh chu a khawngaih in a hmangaih em em a ni. Ngaihdamna nun neitu Pathian a ni.

Sual kan tih hian, Pathian kan ngaisang lova, kan ngaihsak bawk hek lo; “ka duh duhin ka awm ang a, ka nunna hi ka thu thu a ni” tih nen a inang a ni. Pathian in sual leh sualna a huat em emna chhan leh awmzia tak chu min hmangaih luat vang a ni. Chu sual leh sualna avangin kan chungah eng thilte nge thleng dawn tih a hriatchian em vang a ni. ‘Pathian in min hmangaih a ni’ tih hi engtinnge kan hriat theih a? Bible a tangin kan hre thei a ni.

Pathian chuan a fapa mal neih chhun chu min pe a, kan sualna avanga chatuan hremhmuna kal tur keini hi, Amah nena inrema kan lo awm theih nan leh kan sualna te ngaihdam a nih theih nan, Kalvary kraws-ah a fapa nunna chu kan tan a hlan a, a thisen chhuak chuan kan sualna zawng zawng chu min silfai sak a, chhandamna kawng min siam sak a ni. Heng a thiltih zawng zawng atang hianin a hmangaihna ka hmu thei a ni. Isua Krista hian khawvela a lenlaiin sualna reng reng a nei lo. Misualte thian tia, dik lo taka puh a ni. Sual fate a hmangaih em avangin a tawp thlengin a zawng chhuak a ni. Chutiang bawkin, keini pawh ringtu la ni rih lo ten chhandamna an lo chan theih nan theihtawp chhuaha tan kan lak a tul tak zet a ni.

PS: READER DIGEST a Alanna Nash a ziah “Lesson from Billy Graham” atanga lakchhawn a ni.

Comments are closed.