Zawi zawia boralna

 

Uțawk hi bêl chhûngah dah la, tui leih la, Gas-ah han chhuang bawrh bawrh la, tui chu zawi zawiin a rawn sa zêl ang a, Uțawk erawh a zuang chhuak miah lovang. Uțawkte hian an taksa lumna (body temperature) hi an siam rem (adjust) zung zung thei a, tui temperature a lo sân khân, sâ a tawrh theihna'n a taksa kha a lo insiamrem ve zêl mai a. Chuvângin a thi nghal mai dâwn lo...


Tui hi Celsius degree 100-ah a so țhîn a. Uțawk chuan tui Celsius degree 100 (boiling point) a nih chiah hian a taksa a 'adjust' thei ta bîk lova. Zuan chhuah a tum ta țhîn a. Amaherawhchu, Boiling point alo thlen khân chakna thahrui (strength) a neih kha a in adjust-na lamah alo zo vek tawh a, thahrui a neih tawh loh avângin a zuang chhuak thei ta lo va, a thi ta țhîn!


Eng chu nge a thih chhan? Tui so vangin a thi, kan ti thei âwm e. Amaherawchu, chakna a neih lâia a zuan chhuah loh vâng ani ve bawk! Ngawi renga tui satna lo do lêt a, insiamrem zêl lo khân, tui Boiling Point a thlen hma khân zuang chhuak se chu a dam ngei ang !

 

Kan nitin nunah hian sual tura thlêmna te, harsatna te kan tâwk fo țhîn; ho tê atanga intan chhovin! Min tibuai thei sual chi hrang hrang lakah hian, ngawi renga lo tawrh tlawk tlawk emaw, lo ngaihzam zêl mai chi ani lova; min tibuai thei sual hnathawh chuan, min chîm buai a, min rawn hneh a, kan boral hmâ ngei hian, tlân bosan tura kan lo chêt chhuah a ngai ve țhîn a. Huaisenna leh chakna kan neih lâia kan tlân bosan loh zawngin, kan thahrui zawh tawh hnuah chuan sualin min ei zo mai dawn alo ni!


Kan Pathian thu chuan, "I nunna tûrin tlân chhuak rawh; i hnung lam hawi suh la, phaizâwl rêng rêngah hian ding hek suh; tlângah sâwn tlân rawh, chutilo chuan i boral dah ang e." ati. (Gen. 19:17).

SUAL kalsan lova, ngaizam a, mahni zawk lo in siamrem zêl hi zawi zawia boralna lamtluang zawhna ani, tih min zirtir awm e.