NITIN LALPA NEN
January 4, 2016 

Pathian hian a lo ngaithla meuh em!!!

     Chhiar tur    :- Matt 26:39-42; 27:45-46
     Chang vawn    :- ‘Ka Pathian, ka Pathian, engah nge mi kalsan?”(27:46)
     Kum khat tan    :- Gen. 10-12; Matt. 4

“A chang chuan Pathian hian ka tawngtaina hi a lo ngaithla lo niin ka hria”, tiin hmeichhe pakhat a pasal zu ngawlvei avanga lungngai leh mangang chuan a sawi chhuak ta hlul mai. A pasal sual bawi atanga a lo chhuah theih nan, kohhran tawngtaina ah pawh vawi duai lo a thlen tawh. Mahse, Pathian thu nena chhungkaw hlim tak din a, a pasal Pathian lama lo hawi tura a beiseina chu a tan chuan duhthusam sungtuahna khawvel lek a lo ni ta. Pathian hnenah a duhthu thlen thin mahse, a duh anga chhanna erawh a la hmu lo.

A dilna hi Pathian tan pawh a thiltha, Pathian ropuina turin ni tam vawi duai lo a dil tawh. Mahse, Pathian hnen atang chhanna a hmu si loh chuan, ‘Pathian hian a lo ngaithla nge ngaithla lo’ tihhi mihring lam chuan zawhna awm reng a ni. Isua Gethsemane huana a tawngtaina kha kan hriat reng fo a tha. “Aw ka pa, a theih chuan he no hian mi pel hram teh se”(Matt. 26:39), tiin a tawngtai a, mahse chhanin a awm lo. Sual fate chhandam tura Krossa a thih kha Pathian thiltum zawk a ni. Pathian in amah chu kalsan angin ngai mahse, Pathian hnenah rinawm takin a tawngtai fan fan a, chuchuan Pathianin a tawngtaina a ngaithla a ni, tih a entir a ni. 

Keini pawh Pathian hnena kan tawngtai hian Pathian hian engtinnge min chhan ang le? Engtikah nge? Engtiang kawngzawngin nge? tih chu hre lo mah i la, Pathian in ka tan tha turin ro a rel ang, tia amaha rinna nghah tawp mai hi ringtute kan tih tur zawk a ni. 

Keinia kan hriatthiam loh thilte hi, engkim hretu Pathian hnena hlan/nghah tawp mai hi a hahdam thlak ber a ni. Pathianin kan tawngtaina auaw hi a ngaithla reng a, kan duhdan ni lo, ama duhdan leh remruat angin hna a thawk chhunzawn ang, tihhi rin tlat tur a ni. DAVE BRANON

 

Aw Lalpa, ka tawngtaina chhana a awm lohna chhan hi ka hriat a tul kher lo.

Nang ka tana tha tura remruattu chuan i rumruat dan leh a hun leh ni nghak thei turin min zirtir zawk ang che. Amen