PRESBYTERIAN CHURCH USA CHUAN "ISRAEL" TIH HMING HI LAM RIK LOH AN TUM! SETANA KUTCHHUAK - 'REPLACEMENT THEOLOGY' IN PAWI A KHAWIH THUI!
Presbyterian Church USA chuan an kohhran tawngtaina thu atangin "ISRAEL" tih hming hi lam rik loh an tum mek. A chhan nia an sawi chu hman lai Thuthlunghlui hun laia Israel ram leh tun huna Israel ram hi thliar hran a tul an ti a ni.

Hetiang thil hi thil thar a ni lo. Hitler-a ngei pawh khan Juda hming tih bo vek tumin a hun laia Theologian-te kha Bible a lehlin that tir a, chu Juda hnam huatna thlarau chuan Protestant kohhran hring chhuaktu Martin Luther-a ngei pawh kha a man nasa hle nghe nghe a ni.
Khawvelah Islam sakhua a hrang tual tual a, chu mi rual vek chuan Juda/Israel hnam huatna (Anti-Semitism) hian tunlai hian khawvel politics leh boruak inlumlet hi a luah lian telh telh thung a, Hitler-a hun lai ang deuh khan tunah hian Europe ram hmun tam tak leh USA thlengin Judaten tihduhdah leh beih an tawk nasa tial tial bawk. Chumi avang chuan tun hnai hian heng ram hrang hrang atangte hian Juda ho tam tak Israel ram panin an pem ruih ruih a, tun kum 10 kal ta chhunga Juda ho an ram pana an haw nasat ber tum a ni e an ti.
He Anti-Semitism thlarau hian tun hmaa "Evangelical" kohhran tam takte pawh a hruai bo mek a, Israel huatna boruak chuan kawng hrang hrangin hlet a chhuah mek zel a ni. Chung kohhran ho zinga a thusa ber pawl chu PCUSA hi a ni nghe nghe.
Heti taka Israel huatna, kohhran thleng thlenga a lo lian ta hi a chhan bulpui ber pakhat chu "Replacement Theology" an tih, Pathianin Israelte kha a hnawl a, an aiah Kristiante hi "Israel thar" chu kan ni tawh zawk tia inzirtirna hi a ni. Bible kan en erawh chuan Pathianin Israel thlahtu Abrahama, Isaka leh Jakoba te hnena a thuthlun kha "kumkhua atan" a ni. Tun thleng hian Pathianin Abraham hnena "Malsawmtu che chu mal ka sawm ang a, anchhe lawhtu che chu anchhia ka lawh ang" a tih kha a la ding reng. Pathianin Israel hnam a hnawl lohzia leh Kristiante (Jentailte) hi an aiawha min thlan kan nih lohzia chu Rom bung 11 ah khan a chiang lutuk! Krista zara thutiam ro luahtu, "Abrahama thlahte" nihna kan nei, a dik. Mahse, chu chuan Pathianin a hnam thlan Israel te a hnawl tihna erawh a ni hauh lo tih hi i hre nawn leh ang u.
Zawlnei Jeremia sawi angin khawvel kil tin atangin Israela thlahte an haw khawm mek zel. Hun tawp chinchhiahna hrang hrang a thleng dik chho mup mup zel e.
LAL ISUA hming leh YAHWEH (JEHOVA) hming avanga khawvel huat hlawh mek Kristiante leh Israel hnam hi Pathian thlan ve ve kan ni a, min thlan dan erawh a dang. Israel ho chu Abrahama atangin a tlang chhuak a, keini erawh chu Krista kaltlangin min thlang. Chuvangin, Israel hnam hian an Messia (Krista) ISUA hi an lo hriat theih nan an tana tawngtai zel hi Kristiante tih tur dik tak zawk chu a ni.

source: Ramdinthara Sailo, special report